ඉඟුරු වගාව හා සැකසීම

වසුන් යෙදීම:-

 

     වසුන් යෙදීම  මඟින්, අංකුර වර්ධනය ඉක්මන්වීම, පස සෝදා යාම පාලනය වීම, පසෙහි උෂ්ණත්වය අඩුවීම,

වල් මර්දනය වීම සහ පසෙහි භෞතික ගුණංග දියුණුවීම සිදු වේ. වසුන් යෙදීම මගින් වර්ධනය වන රෛසෝම

 හිරුඑළියට නිරාවරණය වීම වලක්වයි. එසේම රෛසෝම වර්ධනය පහසුවීම පිණිස පස බුරුල්ව තබයි. 

වැඩෙන ඉඟුරු බෝගය මූල මණ්ඩලය ඇවිස්සීම එහි පසු බෑමකට හේතුවක් වන නිසා වල් මර්දනයට වඩාත්

සුදුසු ක්‍රමය වන්නේ වසුන් යෙදීමයි.වසුන් යෙදීම නිසා ලබාගත හැකි තවත් අමතර වාසියක් වන්නේ  භෞතික

සහ රසායනික ගුණාංග වෙනස්වීම හේතුවෙන් පසෙහි ලබාගත හැකි පොටෑසියම් සහ පොස්පරස් ප්‍රමාණය ද

වැඩිවීමයි. 

                    

        පිදුරු,දහයියා, දිරූ යතු කුඩු සහ පොල් අතු ආදිය වසුන් සඳහා භාවිතා කළ හැකිය.කොහුබත් භාවිතා

කිරීමේදී එහි ඝනකම සෙ.මී. 5 ට වඩා අඩු විය යුතුයි.කොළ පොහොරද වසුන් සඳහා භාවිතා කළ හැකිය.  

කොළ පොහොර ලෙස ග්ලිසීඩියා අමු කොළ කි.ග්‍රෑම්. 4 ක් අඩි 3 1/2 × 10 පාත්තියකට මාසයකට වරක්

යොදන්නේ නම් එය වසුනක් ලෙස ක්‍රියා කරන අතරම, අවශ්‍ය පොහොරද සපයයි.ග්ලිසීඩියා කොළ මගින්

වට පණුවන් පාලනය වීමද සිදුවේ.

 

        පළමු වර වසුන් යෙදීම ඉඟුරු බීජ සි‍ටුවීමෙන් පසුවත් දෙවෙනි සහ තෙවෙනි වර පිළිවෙලින් දින 45ක දී

 පමණ සහ මාස 3 කදී පමණසිදුකළ හැකිය.

 

වල් මර්දනය:-

         වල් මර්දනය සහ වසුන් යෙදීම එකවර සිදුකළ හැකි කාර්යයන් දෙකකි.ඉඟුරු ඒකබීජ පත්‍රී ශාකයක්

බැවින් තෘණ කුලයේ වල් පැළෑටි මර්දනයට යොදන රසායනික වල්නාශක යෙදීම ප්‍රායෝගික නොවේ.

වල් පැළ කුඩා කාලයේ දී අතින් ගලවා ඉවත් කළ යුතුයි. වසුන් යෙදීම මඟින් වල් පැළෑටි සැලකිය යුතු මට්ටම

කට අඩුවේ.ඉඟුරු වගාවක වර්ධන  කාලයතුළ සාමාන්‍යයෙන් දෙවතාවක් හෝ අවශ්‍ය නම්  තුන් වතාවක් 

වල් මර්දනය කිරීම අවශ්‍ය වේ.පළමු වල් මර්දනය බීජ සි‍ටුවා සති හයකින් පමණ (දෙවන වසුන් යෙදීමට පෙර)

සහ දෙවන වල් මර්දනය බීජ සි‍ටුවා මාස 4 කින් පමණ සිදු කිරීමද යෝග්‍ය වේ.

 

පස් ලංකිරීම:-

              පැළ මුලට පස් ලංකිරීම ඉඟුරු වගාවේදී කළ යුතු වැදගත් ශෂ්‍ය විද්‍යාත්මක කාර්යයකි.රෛසෝම

වර්ධනයට උපකාරිවන අතර වැඩි අස්වැන්නක් ලබා ගැනීමට ද හේතුවේ.එසේම වර්ධනය වන රෛසෝම

වලට ප්‍රමාණවත් වාතනයක්ද සිදුවේ. තවද රෛසෝම වලට හානි කරන කොරපොතු කෘමියා මර්දනය කිරීම

සඳහා ද වල් මර්දනය සඳහාද පස් ලංකිරීම උපකාර වේ.පස් ලංකිරීමෙන් වැඩෙන රෛසෝම තිරස්ව නොව

සිරස්ව වර්ධනය වීමට හේතුවන අතර ඒකක භූමි ප්‍රමාණයකින් ලැබෙන රෛසෝම ප්‍රමාණය වැඩි කරගැනීමටද

හේතුවේ.

 

              වැඩෙන බෝගයට පේළි දිගේ වරින් වර පස් ලං කළ යුතුය.පළමු පස් ලං කිරීම රෛසෝම

ප්‍රරෝහනය වන මුල් අවස්ථාවේදී පළමු මතුපිට පොහොර යෙදීමත් සමගම කළ යුතුය.රෛසෝම වර්ධනය

වන විට ඒවා පොළව මතුපිටට එන අතර, ඒවා වැසීමට වරින් වර පස් එකතු කළ යුතුය.සි‍ටුවා සති 6 කින් සහ

 මාස 4 කින් පස් ලං කිරීම ද සිදු කළ හැක. වගා කාලය තුළ පස් වරක් හෝ හය වරක් පස් ලං කිරීම ගුණාත්ම

යෙන් ඉහළ වැඩි අස්වැන්නක් දීමට හේතු වේ. ප්‍රමාණවත් ලෙස පස් එකතු කිරීමට අපොහොසත් වන අවස්ථා

 වලදී තිරස්ව වැඩුණු ගැටලු සහිත ඉඟුරු රෛසෝම ඇතිවේ.

 

සෙවණ පාලනය:-

                 ඉඟුරු මද සෙවණ ප්‍රිය කරන බෝගයකි. එහෙත් එහි වර්ධනයට සෙවණ අවශ්‍යම නැත. ඉඟුරු

වල සෙවණ අවශ්‍යතාවය පිළිබඳව පර්යේෂණ රාශියක් සිදු කර ඇත. සෙවණ තත්වයන්, පඳුරේ උස, පඳුරු

සංඛ්‍යාව වැඩිවීමට සහ ආහාර නිෂ්පාදනය වැඩි වීමට හේතුවේ.සෙවණ සහිත ස්ථානවල වගාකරන ඉඟුරු අල

හැකිලීමකට ලක් විය හැකි බැවින් එය අවාසියකි.අධික සෙවණ තත්වවලදී පඳුරු සංඛ්‍යාව, පත්‍ර සංඛ්‍යාව සහ

අස්වැන්න අඩුවේ. ඉඟුරු ශාක සම්පූර්ණයෙන්ම හිරු එළියට නිරාවරණය කළපසු අස්වැන්න වැඩි වන බවත්

ඊට සාපේක්ෂව ඔලියොරෙසීන් ප්‍රමාණය වැඩිවන බවත් සොයා ගෙන ඇත.මද සෙවණ තත්වයන් හිතකර බව

පර්යේෂණවල නිගමනයයි.ඒ අනුව 25% - 50% සෙවණ තත්ත්ව වලදී පෝෂක උරා ගැනීම වැඩිවන අතර

ඉහළ අස්වැන්නක් ලබා ගත හැකිය. 25% සෙවණ මට්ටමකදී වාෂ්පශීලී තෙල් ප්‍රතිශතය ද ඔලියොරෙසීන

ප්‍රතිශතය ද සැලකිය යුතු ලෙස වැඩිය. සෙවණ මට්ටම 50%  වැඩිවූ විට අස්වැන්න අඩුවේ.සම්පූර්ණයෙන්ම

හිරු එළියට නිරාවරණය වී ඇති ඉඟුරු වගාවක පත්‍ර දිලීර හානියකට ( පත්‍ර පුල්ලිරෝගයට) ලක්වූ පසු වර්ධනය

ඇනහිටීමක් නිරීක්ෂණය කර ඇති අතර, මද සෙවණ තත්ත්වයකඇති ඉඟුරු වගාවක් දිලීර හානියකට ලක්

වූවද එහි වර්ධනයේ පසුබෑමක් දක්නට නොලැබේ.